Appel en Robbie Wessels snoer kragte vir ‘Boereworsgordyn’

Afrikaanse musiekliefhebbers kan regmaak vir ’n opwindende nuwe liedjie! Die veelsydige kunstenaars Appel en Robbie Wessels het hul kreatiewe talente saamgespan vir hul splinternuwe liedjie, “Boereworsgordyn”.

Dié liedjie is geskryf deur Appel en Robbie self, met die gesoute Murray Lubbe wat die liedjie vervaardig het, terwyl Paulo Azevedo die stemwerk in die Coleske-ateljee behartig het.

“Die Boereworsgordyn is daardie denkbeeldige grens tussen Pretoria en Johannesburg – en spesifiek Centurion, wat dikwels as die skeidslyn tussen die twee stede gesien word. Ek en Robbie het besluit om ’n lekker lawwe, aksiebelaaide rugby-verhaal rondom hierdie idee te bou,” verduidelik Appel.

Robbie voeg by: “Verwoerdburgstad, soos Centurion eers genoem was, was jare terug deur sommige mense as die ‘Boereworsgordyn’ bekend. Ek is nie seker hoekom nie, maar vir my klink dit soos ’n beskrywing van ’n lekker klomp mense wat saam bly, saam kuier en saam rugby kyk.”

Volgens Appel is hierdie liedjie ’n viering van wie ons is as Afrikaanse mense—rugby, braai, lekker lag, en ’n goeie tyd hê saam met vriende en familie

“Ek hoop mense gaan mal wees oor hierdie liedjie—iets wat jy hard speel op ’n braai, in jou bakkie, of op pad na Loftus.” sê hy.

Robbie Wessels voeg laggend by: “Ek het probeer om saam met Appel lekker skerp lirieke uit te dink. En natuurlik het ek ’n paar van my alombekende dansies ingewerk in die lirieke. Die lekkerste deel was om saam met Appel te skryf. Ek het besef hoe ongelooflike liriek- en melodie-skrywer hy is. Dit was ’n fees.”

Die musiekvideo, verfilm deur Conrad Theron van Atlas Media, neem kykers op ’n humoristiese en aksiebelaaide reis.

Kyk die video hier onder:

Appel verduidelik: “Dit speel af tydens ’n spannende rugbywedstryd tussen die Boereworskartel en die Snoeke. Die Boereworskartel is in groot moeilikheid en loop agter op die telbord. Hul afrigter, Jacques Potgieter (oud-Springbok en tans afrigter van Centurion Rugbyklub), besef hulle het ’n kragtige inspuiting nodig om die span se gees aan te wakker. Hy bel toe vir my en Robbie—want ons het ’n geheime boereworsresep wat ’n span se gees binne sekondes kan omdraai.”

“Ons daag toe op, met ’n spesiale oproep en ons geheime wapen – die WORS SQUAD!” sê Appel opgewonde. “Ek is verskriklik trots om ’n paar Springbok-helde en Suid-Afrikaanse rugby-ikone in die video te hê: Willem “Die Yster” Alberts, Jannie du Plessis, Marcell Coetzee (kaptein van die Blou Bulle), JP en Ruan Smit (die bekende tweeling van Leeus-faam).”

“Hierdie manne bring krag, gees en aksie na die veld toe—en natuurlik ’n goeie klomp boerewors en harde houe,” lag Appel.

Appel sê die musiekvideo sou nie moontlik wees sonder hul borge nie. Mondanette Slaghuis het gesorg vir die beste boerewors in die land, Donkey Long Tong en Foute (Appel se eie drankreeks) het ook hul ondersteuning gebied.

“Ons het lanklaas ’n musiekvideo gesien met soveel aksie en humor in die Afrikaanse musiekbedryf. Ek en Robbie skryf stories met musiek, nes Jan Spies, PG du Plessis en Tolla van der Merwe dit met woorde kon doen. Dit is ’n liedjie, ’n storie en ’n fees in een—ek dink mense gaan dit vreeslik geniet,” sê Appel.

Jy kan die liedjie HIER stroom / aflaai.

Hou jou ogies oop vir gereelde opdaterings in die Music Videos kategorie op SA Music Zone.