Met die openingswoorde, “Niemand weet waar die wind ons neem nie, en of woorde ‘n ewigheid saam kan bind nie,” stel Esté Gross haar nuwe enkelsnit “Die Deur” bekend.
Hierdie treffende lied is veel meer as net ’n musiekvrystelling – dit is ’n emosionele reis wat dieper delf in die betekenis van ware liefde, verlies en die nalatenskap van geliefdes.
“Die Deur” is ’n Ode aan liefde – in al sy vorme
“Die Deur” ondersoek wat dit werklik beteken om iemand volkome en wedersyds lief te hê. Volgens Esté gaan die lied oor daardie keuse om die deur van liefde oop te hou – selfs in ’n wêreld wat soms onstuimig en onvoorspelbaar is. “Om die deur vir mekaar oop te hou… en om vrygewig met ons woorde en tyd teenoor mekaar te wees,” verduidelik sy.
Die melodie is ryk en nostalgies – iets wat luisteraars laat voel asof hulle deel word van ’n kunswerk. Esté nooi elke luisteraar uit om hul eie betekenis in die lied te vind:
“Ek laat dit doelbewus oop vir elkeen wat daarna luister… My hoop is dat die liedjie jou sal ontmoet op die tyd en plek waar jy is.” Sommige mense het selfs vir haar gesê dit klink soos die perfekte trouliedjie – ’n weerspieëling van die lied se universele trefkrag.
’n Persoonlike huldeblyk aan ’n buitengewone moeder
Die lied is in besonder opgedra aan Esté Gross se ma, Hester van Rensburg (ook bekend as Hester Appelboom) – ’n skilder en skrywer wat sy as haar grootste invloed in die lewe en kunste beskou. Hester is op 18 Junie 2023 op 62-jarige ouderdom onverwags aan ’n aortiese aneurisme oorlede.
“Ek het lank geskryf aan ‘Die Deur’, min wetende dat ek eers werklik die betekenis sou verstaan wanneer ek die laaste reël skryf,” sê Esté. “Wanneer jy iemand werklik liefhet, bly die deur van liefde altyd oop. Haar menswees en nalatenskap sal altyd deel wees van my.”
Die simboliek van sonneblomme
Die musiekvideo vir “Die Deur” is geskiet in ’n sonneblomveld – ’n simboliese keuse wat haar ma se liefde vir die blom uitbeeld. “Sonneblomme was haar gunsteling.
Sy het ook talle skilderye daaroor gemaak,” sê Esté. Net soos haar ma ruimte in haar kunswerk gelos het vir interpretasie, hoop sy dat luisteraars ook hul eie betekenis in “Die Deur” sal vind.
Kyk die musiekvideo hier onder:
Esté Gross se loopbaan en vorige suksesse
“Die Deur” volg op Esté se vorige suksesvolle enkelsnitte, insluitend “Weerklink” (benoem vir ’n Aitsa-toekenning in 2024), “Deur die Storm” (’n samewerking met Hemelbesem, die ATKV en die UP Youth Choir), en “Hemelruim” (met Len Muller), wat in 2022 bekroon is as beste geestelike liedjie van die jaar by die Aitsas.
Benewens haar musiekloopbaan is Esté Gross ook ’n gerespekteerde stem in die Afrikaanse mediabedryf. In 2024 is sy deur die Afrikaanse Taalraad vereer met ’n Jeugkoker-toekenning vir haar bydraes as omroeper, nuusleser, skrywer en liedjieskrywer. Sy is ook al verskeie kere genomineer vir die ATKV-Mediaveertjies.
In 2022 is sy benoem as beste nuusleser by die nasionale Radio Awards en het Esté Gross ’n #GoeieGons-toekenning ontvang van die Solidariteit Gilde vir Kommunikasie en Bemarking.
“Die Deur” is ’n lied wat met die siel praat – ’n intieme weergawe van verlies en liefde wat by elkeen op ’n unieke manier aanklank vind. Esté Gross bewys weer eens hoekom haar werk diep resoneer met gehore landswyd.
Hou jou ogies oop vir gereelde opdaterings in die Music Videos kategorie op SA Music Zone.
To stay in the loop with all things SA Music, Subscribe to our newsletter.
Looking for something to do? Check out our Upcoming Events section or the SA Gig Guide.
Want to explore the SA Music Scene? Check out our Artist/Band/Group Profiles section.
Want to discover fresh music? Follow our editor's 2025 playlist on Spotify.
