Ná die sukses van “Ek en Jy, Dikgat” stel die synth-pop duo MyMyMy nou eindelik “Die Partytjie”, hul tweede enkelsnit van die jaar, bekend. Dis ’n hipnotiese droompop-ode wat senutergend vra: “Is die partytjie dan nou verby?”
Conrad van Breda en Jana Oosthuizen is terug met ’n snit so ver verwyderd van die gewilde dog wyd geminagte “Dikgat” dat amper niemand sal glo dieselfde skeppers is hier betrokke nie.
“Dit was amusant om te sien hoe lelik mense kan wees oor iets wat hulle nie verstaan nie,” sê Conrad. “Ons wou ‘Ek en Jy, Dikgat’ telke male verdedig, by familie en vriende, maar veral by onaangename kennisse. Engelse mense het gedink dit is fat shaming. Afrikaanse mense het gedink dis anti-Afrikaner. Die kommenste mense het dit as kommen kak afgemaak. Maar ons het op die ou end met niemand gestry nie.”
Hulle reaksie op al dié drama het gelei na “Die Partytjie”
Dié lied is amper ’n jaar na die eerste lockdown se aanvang tydens ’n week van isolasie in die klein dorpie Rooi-Els aan die Kogelberg se kus opgeneem – in ’n huis met ’n uitsig oor Valsbaai.
En ná ’n jaar se lockdown was die uitkoms van die naweek se kreatiewe verrigtinge in baie opsigte voorspelbaar: ’n meditasie oor die pad vorentoe in ’n voortslepende pandemie. Met die eerste “oor”-opslag is “Die Partytjie” aanvanklik ’n sober en eerlike besinning oor die moeilike keuses waarvoor musikante te staan kom, maar met die liriek “Is die partytjie dan nou verby” – wat 25 keer herhaal – skuil daar tog ander betekenisse onder die oppervlak. Maar wat beteken die lirieke en hierdie snit vir MyMyMy?
“Verbeel jou dis 05:00 die oggend. Die laaste gas is nog nie huis toe nie, maar jy het drie ure gelede reeds die musiek afgesit. Sommige lê uitgepass in donker hoeke. Ander het uit desperaatheid nog plesiere gaan soek. Maar jy weet hulle gaan dit nie kry nie. Jy weet die partytjie is nou verby.”
Is dit ’n metafoor? As dit van MyMyMy afhang, beslis: “Ons partytjie gaan oor baie dinge: weltschmerz, sterflikheid, pandemiedepressie, oud word, aanvaarding, leë drankkaste en ja, dat huis toe gaan nie altyd ’n slegte ding is nie.”
Die video is in die eetlokaal van die enigste kroeg op Rooi-Els, The Drummond Arms, verfilm. Die plek is bekend vir hulle gesellige atmosfeer, wonderlike kos en bobbejane.
Janine vertel meer oor die video vir “Die Partytjie”
“Die aand toe ons die opnames klaargemaak het moes ons dit uit die aard van die saak vier. En terwyl ons teug aan ’n tequila of twee het ons besluit die video moet hier geshoot word.”
Die video stel MyMyMy se laaste optrede aan ’n kwynende gehoor voor. “Dit was vir ons interessant om ’n vertoning te verbeel waar die gehoor nie regtig daar wil wees nie en almal eindelik wegdros en ons los sodat ons vir onsself, die leë stoele en plastiek tafeloortreksels sing.”
Johan Nel het die kamerawerk en redigering behartig en slaag uitstekend daarin om die misterie van die omgewing en die sensitiwiteit van die oomblik vas te vang. Die gehoorlede bestaan uit Edo Mostert – wat ook almal se grimering gedoen het; Lucia Booyse – die bestuurder van The Drummond Arms; en Brend Cloete – ’n besoeker en plaaslike inwoner.
MyMyMy se enkelsnit is van vandag (die 17de September 2021) beskikbaar op alle digitale platforms.
Jy kan MyMyMy se musiek op Spotify, Deezer of Apple Music stroom / download.
Hou jou ogies oop vir gereelde opdaterings in die Music Videos kategorie op SA Music Zone.
If you like what we do and you want to support us, feel free to buy us a coffee!
To stay in the loop with all things SA Music, Subscribe to our newsletter.
Looking for something to do? Check out our Upcoming Events section or the SA Gig Guide.
Want to explore the SA Music Scene? Check out our Artist/Band/Group Profiles section.
Want to discover fresh music? Follow our editor's 2025 playlist on Spotify.
