Daar is liedjies wat jy nie net hoor nie – jy voel dit in jou borskas. Met sy nuutste vrystelling, “Sy Is Die Een”, bewys Ampie weer hoekom sekere woorde en melodieë eenvoudig nie verouder nie.
Hierdie ikoniese liedjie, oorspronklik geskryf deur Joe Niemand en in 2002 as Crescendo-wenner bekroon, kry nou ’n vars en opregte vertolking wat steeds die oorspronklike emosie eer.
Vir Ampie is “Sy Is Die Een” veel meer as net ’n mooi liedjie. Dis ’n ode aan vrouwees en aan die misterie van liefde.
“Dis so mooi beskrywing van die mooier geslag. Dis asof daar iets heiligs aan ’n vrou is, dis wat ek probeer vasvang,” sê hy.
Beeldspraak Wat Bly Leef
Die lirieke van “Sy Is Die Een” is ryk aan beeldspraak: “Sy ruik soos die reën en sy beweeg soos die wind.” Dis die tipe reël wat jou onmiddellik intrek – iets natuurlik, iets vry, iets wat nie vasgepen kan word nie. Ampie se interpretasie beklemtoon daardie sagtheid, maar ook die stille krag wat daarmee saamgaan.
Die liedjie beskryf haar ook as iemand wat “dink soos ’n vrou, maar voel soos ’n kind.” Volgens Ampie is dit ’n waarheid waarin baie mense hulself herken:
“Ons almal sal altyd eintlik kinders bly. Dit maak nie saak hoe oud jy is nie – saam jou geliefkoosde mense is almal simpel en die ware jy kom uit. Ons almal is maar net mens.”
Een van die sterkste oomblikke in die liedjie bly die reël: “Sy loop asof sy nie omgee nie, maar haar hart gee haar weg.”
Dis ’n eerlike blik op hoe mense hulself beskerm, selfs wanneer hulle diep voel. Ampie glo dis juis hierdie menslikheid wat die liedjie steeds relevant maak:
“Almal beskerm hulself en almal is sensitief met gevoelens al maak jy asof jy nie is nie. Mens moet soms daai front voorsit dat mense jou respekteer… of ten minste bang is vir jou in ’n gesagsposisie.”
Daardie balans tussen sag en sterk, oop en beskermend, gee die liedjie sy egtheid – en laat Ampie se weergawe oortuigend land.
“Sy Bring My Huistoe” – Huis Is ’n Mens
Die refrein herhaal ’n eenvoudige maar kragtige waarheid: “Sy bring my huistoe.”
Vir Ampie is “huis” nie ’n plek nie, maar ’n persoon. Iemand wat jou teruganker wanneer die wêreld jou uitmekaar probeer trek. “Dis maar net daai persoon wat maak dat jy eerder by die huis wil wees as in die strate.” sê hy.
Dit is daardie tipe liefde wat jou kalmeer, jou koers gee, en jou herinner wie jy regtig is.
Die liedjie wys ook op ’n belangrike dinamiek: “Sy moedig my aan en sy staan my teen.”
Volgens Ampie is dit presies hoe ware liefde werk – dit dra jou, maar dit slyp jou ook.
“Dis iemand wat jou amper onvoorwaardelik lief het soos ’n ouer vir ’n kind… sy dra jou belange op die hart en wil nie hê jy moet struikel en val nie.”
Tog erken hy die realiteit: dieselfde persoon wat jou optel, kan jou ook die hardste tref.
“Dis min dinge wat so naby ’n sterk man kan kom soos ’n vrou… en dis vreemd, want dit is hulle wat jou ook die hardste laat val, maar die liefde sal vir ewig keer op keer seëvier.”
’n Beeld van Hoop en Toekoms
Een van die mees treffende beelde in die liedjie is: “Sy dra my lente op haar lippe en my kinders in haar oë.”
Dis ’n reël vol hoop, vol môre. Vir Ampie bring dit die hele idee van vrouwees en lewe terug na iets amper foutloos.
“Dis maar net weer daai beeld van die vrou. Foutloos en mooi en keer op keer val elke man tot op sy knieë. Ek glo die lewe sonder vrouens sal ’n harde plek gewees het.”
En as hy sy eie lewe daarby voeg?
“Ek sal net my kinders ook in die mix gooi dan het ons die perfekte opsomming.”
Die reël “Eendag, is dit sy” klink soos ’n laaste hoofstuk van ’n liefdesverhaal — ’n nalatenskap wat bly staan wanneer alles anders vervaag. Maar Ampie hou dit eerlik: selfs die mooiste liefde bring uitdagings.
“Hoe mooi die vrou ookal is… kan hulle jou ook totaal en al klaar maak. ’n Vrou bly maar ’n vrou. Dis maar kommunikasie en wedersydse respek wat dit maak of breek.”
’n Tydlose Klassieke, Eerlik Vertolk
Om ’n liedjie met só ’n nalatenskap oor te dra, verg verantwoordelikheid. Ampie praat met groot respek oor Joe Niemand se skryfwerk:
“Joe Niemand is hoogsbegaafd en ’n groot talent… hy is een van die land se top skrywers. Ek hoop maar hy hou van my weergawe.”
Hy beskryf “Sy Is Die Een” as een van Afrikaans se beste liedjies — nie net oor sy skoonheid nie, maar oor sy tydloosheid.
“Die lied is tydloos… dis net so geskryf dat dit tydloos bly want dit gaan oor die vrou en oor die lewe en tyd word nie aan dit gekoppel nie.”
As hy sy weergawe in een woord moet opsom?
“SOLO… maar ek sing die melodie en harmonie.”
Dis eenvoudig, gestroop en gefokus op gevoel. Geen oordadigheid nie. Net eerlikheid. Uiteindelik is “Sy Is Die Een” daardie liedjie wat jy vir iemand stuur wanneer jou eie woorde tekort skiet. ’n Liedjie wat klaar sê wat jy voel.
Ampie hoop presies dit gebeur: “Ek hoop mense speel dit vir die mens vir wie hy of sy lief is. Dit sal die ultimate kompliment wees want dit spreek boekdele.”
Met “Sy Is Die Een” gee Ampie nie net nuwe asem aan ’n klassieke liedjie nie – hy gee dit terug aan die romantici, die dromers, die gebroke harte en almal wat steeds glo liefde kan jou huistoe bring.
Kyk die video vir die liedjie hier onder:
“Sy Is Die Een” is nou beskikbaar op Spotify en alle ander digitale platforms.
Hou jou ogies oop vir gereelde opdaterings in die Music Videos kategorie op SA Music Zone.
Like what you do? Buy us a coffee to enable us to bring your more content like this.
Want to stay in the loop with all things SA Music? Get in the Zone!
Looking for something to do? Check out our Upcoming Events section or the SA Gig Guide.
Want to explore the SA Music Scene? Check out our Artist/Band/Group Profiles section.
Want to discover fresh music? Follow check out editor's playlists on Spotify or YouTube.
