Francois Jacobs, een van Suid-Afrika se geliefde Afrikaanse sangers, is terug met sy sesde enkelsnit, en hierdie keer vat hy die luisteraar na die plaas met ’n aansteeklike Afrikaanse Pop/Country liedjie getiteld “Spel dit Uit.” Met die vervaardiging van die talentvolle Ferdinand Skead van Skead Records, beloof hierdie enkelsnit om die land se dansvloere te verower.
Die liedjie vertel die storie van ’n regte plaasmeisie in haar vellies, wat jou met haar ‘moves’ en country-musiek verlei. Ten spyte van jou rasionele denke – soos die liriek sê: “jou kop sê hou verby” – gee jou hart tog in. “Wat is dan mooier as ’n regte plaasmeisie?” vra Francois met ’n glimlag.
Francois deel dat hy nog altyd ’n country-liedjie wou uitbring, maar nooit gevoel het die tyd was reg nie – tot nou.
“Toe ek hierdie liedjie vir die eerste keer in die ateljee gehoor het, het ek geweet: dít is die een,” sê hy. “Ferdinand het my omver geblaas met sy talent en die produksie van die liedjie – dit is ’n regte danslied waarmee jy stof kan skop op ’n plaasgrondpad!”
“Dis ’n lied wat perfek pas by my styl,” sê Francois. “Die ritme, die lirieke – dit laat jou goed voel, laat jou wil dans en net die lewe geniet. Ek glo die lied gaan perfek werk by braais, op die langpad of sommer wanneer jy net lus is vir lekker musiek.”
Alhoewel Francois al verskeie radio-treffers gehad het, droom hy daarvan dat hierdie liedjie die Afrikaanse trefferparades klim. “Dit sal my hart propvol maak om te sien hoe mense reg oor die land hierop dans,” vertel hy.
Sy loopbaanhoogtepunte sluit in optredes regoor Suid-Afrika en die geleenthede om nuwe mense en dorpe te ontdek. “Dis altyd spesiaal wanneer mense ná ’n vertoning na my toe kom vir ’n foto of ’n mooi woord.”
Die musiekvideo vir “Spel dit Uit” is geskiet deur Stephan van Huyssteen en Franzel van Agter die Mic, by Que Sera Venue in Pretoria Oos. Met pragtige natuur-tonele, ’n knus kaggelvuur en energieke dans op ’n stofpad, vang die video perfek die gevoel van die liedjie vas. “Ons het só lekker gelag en die twee dansers, Deolandre en JP, het dit fantasties gemaak!” sê Francois.
Kyk die video hier onder:
Meer inligting oor Francois Jacobs
Francois is al 17 jaar aktief in die musiekbedryf, met sy musiektalent wat reeds op driejarige ouderdom na vore gekom het. “My ouers sê ek het begin sing nog voor ek kon praat,” lag hy. Musiek loop diep in sy familie – braais is selde sonder kitaar en saam sing.
Buiten sy sangloopbaan is hy ook aktief as MC by funksies en betrokke by Expo’s in Pretoria. Hy hoop om binnekort ook buite Suid-Afrika op te tree, veral in Namibië. ’n Teaterproduksie met ’n volledige band is ook in die beplanning.
Met vier optredes per week landwyd, is Francois Jacobs nie van plan om stadig te vat nie. Hy werk reeds aan nuwe musiek, beplan ’n Wes-Kaap toer en kyk vorentoe na moontlike internasionale geleenthede.
“Ek is stylvol, kragtig en ek sing altyd met baie emosie.” Met inspirasie wat hy uit die gewone lewe en mense om hom put, is Francois se doel eenvoudig maar diep: “Ek wil hê mense moet dans, kuier en ’n goeie tyd hê. En dalk… dalk eendag sing ek hierdie liedjie op die Afrikaans is Groot verhoog.”
Hou jou ogies oop vir gereelde opdaterings in die Music Videos kategorie op SA Music Zone.
Like what you do? Buy us a coffee to enable us to bring your more content like this.
Want to stay in the loop with all things SA Music? Get in the Zone!
Looking for something to do? Check out our Upcoming Events section or the SA Gig Guide.
Want to explore the SA Music Scene? Check out our Artist/Band/Group Profiles section.
Want to discover fresh music? Follow check out editor's playlists on Spotify or YouTube.
