Die talentvolle 15-jarige sangeres Caitie Rock stel met groot opgewondenheid haar nuutste enkelsnit, “Desember Dagdroom”, bekend – ’n vars, energieke en sonnige poplied wat die opgewondenheid en ontsnapping van die Desembervakansie perfek vasvang. Die lied is geskryf deur twee van Suid-Afrika se mees geliefde liedjieskrywers, Juan Boucher en Francois Kleynhans.
“Desember Dagdroom” vertel die storie van ’n jong dagdromer wat uit die klaskamer se venster staar en droom oor warm sand, sonskyn, avontuur en ’n bietjie vryheid – presies wat die titel beloof.
Kleurvolle Musiekvideo Neem Kykers op ’n Droomreis
Die musiekvideo, plaaslik geskiet deur filmmaker Leon Barnard, neem kykers saam op ’n warm, speelse reis deur Caitie se droomwêreld. ’n Groot deel van die video is verfilm by H/S Dr Malan, in die wiskundeklas waar die
“Desember dagdroom” sy oorsprong vind. Mnr Ruan, die wiskunde-onderwyser, vertolk sy rol met groot entoesiasme, terwyl verskeie van Caitie se regte klasmaats ook in die video te sien is.
Verder bevat die video kleurvolle tonele by die Meyerton Publieke Swembad, langs die rivier, en selfs saam met die gemeenskap se bekende tuk-tuk, wat ’n vrolike verskyning maak.
Ten spyte van wisselvallige weer, het die span die perfekte oomblikke vasgevang – insluitend tonele waar Caitie op die swembad dryf terwyl die res onder sambrele moes skuil.
Die laaste tonele op die rivier moes vinnig geskiet word nadat die sluise oopgemaak is en die water dramaties begin styg het.
“Dit was ’n dag wat ons nooit sal vergeet nie,” vertel die span. “Al die uitdagings het net gemaak dat die video nóg meer eg en besonders voel.”
Kyk die video hier onder:
’n Droom Wat Twee Jaar in die Maak Was
Caitie het van kleins af grootgeword met Juan Boucher se musiek – die klanke van kuiers en karritte het haar gevorm. Sy ken sy liedjies woord vir woord, en dit was haar droom dat hy eendag ’n lied vir haar sou skryf. Twee jaar gelede by een van Juan se vertonings het sy uiteindelik die groot vraag gevra: “Sal jy eendag ’n song vir my skryf?” En nou, twee jaar later, het die droom waar geword.
Juan het na haar vorige musiek geluister, vrae gevra, en saam met Francois Kleynhans het hulle “Desember Dagdroom” geskep — ’n lied wat perfek pas by Caitie se lewenslus, energie en jong optimisme.
Caitie Rock is ’n dinamiese, multi-talentvolle 15-jarige kunstenaar van die Vaaldriehoek
Sy blink uit in sang, drama, fotografiese modelwerk en sport, en is ’n kranige hekkiesatleet én toegewyde hokkiespeler. Sy is een van die sangeresse in die 4 Eva Young Band, wat oor die afgelope vyf jaar by groot feeste soos Innibos en Aardklop opgetree het. Haar liefde vir musiek het op negejarige ouderdom ontvlam toe sy haar eerste mikrofoon in ’n sangkompetisie gewen het.
Caitie het reeds verskeie projekte agter haar naam, insluitend haar selfgeskrewe debuutenkelsnit “Carnival”, haar rol as Annie in ’n teaterproduksie in Pretoria, en die temalied “Noordvaal Hokkie”. Haar lied “Soos ’n Rots” word steeds wyd op radio gespeel.
“Desember Dagdroom”: ’n Sprankelende Vakansiepop
“Desember Dagdroom” is Caitie Rock se nuutste vrystelling – ’n sprankelende popsnit wat wys dat haar toekoms in die musiekbedryf blink en grensloos is.
“Desember Dagdroom voel soos my lewe in ’n liedjie – ek droom groot, ek leef voluit, en ek hou daarvan om mense te laat glimlag. Juan en Francois het presies vasgevang hoe dit voel om jonk te wees en vir die vakansie te wag.” sê Caitie Rock.
Hou jou ogies oop vir gereelde opdaterings in die Music Videos kategorie op SA Music Zone.
Like what you do? Buy us a coffee to enable us to bring your more content like this.
Want to stay in the loop with all things SA Music? Get in the Zone!
Looking for something to do? Check out our Upcoming Events section or the SA Gig Guide.
Want to explore the SA Music Scene? Check out our Artist/Band/Group Profiles section.
Want to discover fresh music? Follow check out editor's playlists on Spotify or YouTube.
